ԼՈՆԴՈՆՅԱՆ ՍՈԹԲԻՍԸ ՆՈՐ ՌԵԿՈՐԴ Է ՍԱՀՄԱՆԵԼ

                                                                                  

                                                                                                      ԱՆԱՀԻՏ ԿՈՐՅՈՒՆ

Aivazovsky. The bay of Naples 1878 

Լոնդոնյան Սոթբիսը օրերս Ռուսական կերպարվեստի հեռավար աճուրդ իրականացրեց, որի արդյունքները թերևս զարմացրեցին արվեստասերներին: 

Նախ , սկսենք այն փաստից, որ մայիսի 26-ից հունիսի 2-ը տևած մեկշաբաթյա աճուրդը, բավականին մեծ ծավալ ուներ՝ սկսում էր 19-րդ դարի ռոմանտիկ կերպարվեստից  և գալիս, հասնում էր մեր օրերը՝ շուրջ 144 ռուսական արվեստի առարկաներ:

    Եթե աճուրդին ներկայացված նկարների էսթիմեյթները (նախնական գները)  որոշակիորեն հարմարեցված էին ճգնաժամին, ապա դրանց վաճառքի գները միանշանակ հարուցեցին  արվեստասերների և համաշխարհային ճգնաժամից դադարի  մեջ գտնվող հավաքորդների զարմանքը: Ներկայիս ճգնաժամային իրավիճակով պայմանավորված՝ մեր օրերում իրականացվող  աճուրդները դիտարկվում են մատչելի գներով արվեստի գործեր ձեռք բերելու հնարավորություն: Մինչդեռ աուկցիոնի արդյունքները տպավորություն ստեղծեցին, թե ճգնաժամը որպես այդպիսին գոյություն չունի և համաշխարհային  կրիզիս կոչվածը զուտ պատրանք է:

    Աճուրդին մասնակցող  144 ստեղծագործություններից  վաճառվել է 94-ը, այսինքն՝ գործերի  մոտավորապես 70 %-ը, ինչն անգամ մեծ ցուցանիշ է սովորական աճուրդների ժամանակ, մինչդեռ այս անգամ խոսքը գնում է համավարակի օրերին իրականացված աճուրդի մասին:

       Աճուրդի արդյունքներից պարզ է դառնում, որ բոլոր ժամանակներում էլ Այվազովսկին մնում է հավաքորդների ամենասիրելի և սպասված հեղինակը: Աուկցիոնին ներկայացված նրա 4 աշխատանքներն էլ վաճառվել են: Եվ եթե գործերից մեկը գնվել է  նախապես սահմանված գնի սահմաններում, ապա մնացած գործերը սահմանվածից 20-200 % բարձր գներով են վաճառվել: Այսպիսով, եթե ծովանկարչի էտյուդներից մեկը 8.000-12.000 ֆունթ սթերլինգ էր գնահատված, վաճառվել է 15.000 ՖՍ: Եթե նրանցից մեկը նախատեսված էր վաճառվել 150.000-200.000-ով, վաճառվել է՝ 435.000 -ով, իսկ 800. 000 -1.200.000 գնահատված նկարն էլ 2 մլն 295 հազար ՖՍ է վաճառվել: Ինչպես տեսնում եք, ճգնաժամը որևէ ազդեցություն չի ունեցել աճուրդի վրա, ավելին՝ շատ վաղուց Այվազովսկու կտավները նման բարձր գներով չէին վաճառվել՝ վերջին 10 տարիների ընթացքում նկարչի կտավների գնանկում էր արձանագրվել և այս աճուրդով Այվազովսկին կարծես  կրկին անգամ ամրապնդում է իր դիրքը միջազգային շուկայում:

Ռուսական արվեստի սիրահարներն, ինչ խոսք, չէին  կարող անտարբեր անցնել Շիշկինի, Ռեպինի,  Սերեբրյակովայի, Կոնչալովսկու, Զոոմերի կողքով: Հավաքորդներն անտարբեր չէին նաև 50-60-ականների և ժամանակակից արվեստագետների նկատմամբ:

      Զարմանալի էր , որ աճուրդին վրացի գեղանկարիչ Մերաբ Աբրամաշվիլին որպես  ռուս արվեստագետ էր  ներկայացվել: 2006 թվականին վախճանված նկարչի աշխատանքները ներկայումս մեծ հեղինակություն են վայելում միջազգային աճուրդատներում:

     Ինչպես տեսնում եք, համավարակի առկայությունը արվեստի միջազգային շուկայի վրա որևէ ազդեցություն չունեցավ: Թերևս այն առավել տեսանելի է միջին մակարդակում  և լոկալ հատվածներում:

Aivazovsky. Passing ship on a moonlit night 1868