ՄԱՐԻԱ ԳՈՒԼԵԳԻՆԱ`ԹՈՂ ՀՐԱՎԻՐԵՆ ԵՎ ԵՍ ՍԻՐՈՎ ՀԱՆԴԵՍ ԿԳԱՄ ՀԱՅԱՍՏԱՆՈՒՄ

2013 թվականի մեկնարկն ինձ համար  բավականին հաճելի իրադարձությամբ նշանավորվեց`բացառիկ հարցազրույց , բացառիկ օնլայն հանդիպում աշխարհահռչակ օպերային երգչուհի Մարիա Գուլեգինայի հետ: Մեզանում քչերն են ճանաչում երգչուհուն , առավել քչերը գիտեն, որ նա հայկական արմատներ ունի:

<< Ես ծնվել և մեծացել եմ բազմազգ ընտանիքում`մայրս լեհահրեական ծագումով  ուկրաինուհի է, իսկ հայրս`հայ է, նա ծնվել է Ախլցխայում, որտեղ ես ամառային արձակուրդներին հաճախ եմ հանգստացել:  Ի  դեպ, իմ նախնիները այնտեղ են գաղթել Վանից 1915 թվականի Եղեռնի ժամանակ>>, -պատմում է Մարիա Գուլեգինան:

Նա ծնվել է 1959 թ.օգոստոսի 9-ին Օդեսայում: Մանկական տարիքից հաճախել է բալետի դպրոց և 16 տարեկանում, որպես բալետի պարուհի,  հանդես է եկել Վերդիի  <<Տրավիատա>> ներկայացման մեջ: Հետագայում Մարիայի հայրը նրան արգելել է բալետով զբաղվել,  և նա ընդունվել է Օդեսայի կոնսերվատորիա` Եվգենի Իվանովի դասարան: Վերջինս  մեծ  դերակատարություն է ունեցել ապագա երգչուհու կայացման գործում:1983թ. երիտասարդ երգչուհին Գլինկայի անվան մրցույթում դափնեկրի կոչման է արժանանում, նույն տարում դառնում է Մինսկի Օպերայի և բալետի թատրոնի մեներգչուհի:Սակայն 1986 թ. Չայկովսկու միջազգային մրցույթում երրորդ մրցանակի արժանանալու փաստը մեծ հիասթափություն է առաջացնում Մարիայի մոտ և նա հայրենիքից հեռանալու  որոշում է կայացնում: Առիթն իրեն ուշացնել չի տալիս` 1987թ. նա հրավերք է ստանում Միլանի <<Լա Սկալա>>օպերայից,  որտեղ նրա առաջնախաղը Վերդիի <<Դիմակահանդես>> ներկայացման մեջ Ամելիայի դերերգով է կայանում: Այդ ժամանակ նրա խաղընկերը Լուչիանո Պավարոտին էր, իսկ ներկայացման դիրիժորը`Ջանադրեա Գավացենին:   

 Հետագայում <<Լա Սկալայում>> Գուլեգինան հանդես է գալիս Տոսկայի`  Պուչինի համանուն օպերա , Լեոնորայի `Վերդի <<Ճակատագրի ուժը>>, Աբիգայլի  Վերդի <<Նաբուկկո>>  դերերգերով, որոնցով էլ սկսվում է <<սովետական Մոխրոտիկի>> հաղթարշավը: Մարիա Գուլեգինան հռչակվում է որպես վերդիական ձայն և դառնում է<<Լա Սկալա>>,  <<Մետրոպոլիտեն>>, <<Քովենթ Գարդեն>>, <<Բաստիյ>> օպերաների  սիրելի դրամատիկ սոպրանոն` արվեստասեր հանրությանը ներկայանալով շուրջ երեք տասնյակ դերերգերով: Նրա խաղընկերներն էին Ռենատա Տեբալդին, Միրելա Ֆրենին, Նեո Լուչին, Պլաչիդո Դոմինգոն  և շատ ուրիշներ:Այն հարցին, թե երգչուհին ծանոթ է հայկական օպերային, Մարիա Գուլեգինան պատասխանեց`<<Ցավոք սրտի, ես երբևէ  ներկա չեմ եղել  հայկական օպերային ներկայացումներին, սակայն  շատ եմ սիրում հայկական ժողովրդական երգը,  հատկապես` Կոմիտասին: Մենահամերգներս սովորաբար հենց նրա երգերով էլ   եզրափակում եմ : Ու  չնայած որ,  հայկական օպերային ներկայացումներին ներկա չեմ գտնվել, Ճակատագիրն ինձ հնարավորություն է ընձեռել Մարինյան թատրոնում երգել  երկու հրաշալի հայ երգիչների `Բարսեղ Թումանյանի և Գեղամ Գրիգորյանի հետ>>:

Հայկական միջավայրում  դաստիարակված ցանկացած կին`  Մարիա Գուլեգինան ևս,   իր ամենամեծ ձեռբերումն իր ընտանիքն է համարում`

<< Ամուսինս Վյաչեսլավ Մկրտիչևն է`նա Ռուսաստանի ըմբշմարտի հավաքականի գլխավոր մարզիչն է:Ունեմ երեք հրաշալի երեխաներ և ամեն ազատ վայրկյանս աշխատում եմ նրանց հետ , նրանց կողքին անցկացնել>>,- ասում է երգչուհին:

Այն հարցին, թե կուզենայիք արդյոք  հայ հանդիսատեսի համար երգել, Մարիա Գուլեգինան պատասխանեց`ինչու չէ՞,  թող հրավիրեն և ես սիրով հանդես կգամ Հայաստանում, միայն թե,  թող վաղօրոք պայմանավորվածություն ձեռք բերեն, որպեսզի  հստակեցնեմ ժամանակացույցս :

Հ.Գ. Մարիա Գուլեգինայի  հետ զրույցս կարճ տևեց`նա փորձերի էր շտապում`Իտալիայի Ջենովա քաղաքի <<Կառլո Ֆելիչե>> թատրոնում  Վերդիի <<Մակբեթն>> էր բեմադրվում և երգչուհին լեդի Մակբեթ պիտի խաղար……Ես չեմ նեղվում` ինչ անենք, թե  նյութս փոքր է ստացվելու` ես իմ  լրագրողական երջանկությունն եմ վայելում…